«QazMunaıGaz» UK» AQ basqarma tóraǵasy Saýat Myńbaev atalǵan kompanııanyń biryńǵaı kadrlyq rezervke tirkelgen qyzmetkerlerimen kezdesti. Oǵan sondaı-aq, biryńǵaı kadrlyq rezervke úmitkerlerdi irikteýge qurylǵan komıssııa quramy da qatysty.
«Jas kelse – iske» deıtin qazaq qaı kezde de batyr bolar balasyn jas dep basynbaı, qaıta «arqadan qaǵyp», qoldap-qolpashtap, bilimdi urpaqtyń kishiligin kemsitpeı, kerisinshe kótermelep otyrǵan. Iá, «bulaq kórseń kózin ash» degen danalyq sóz de osyndaıda aıtylsa kerek-ti. «QazMunaıGaz» kompanııasynyń rezervtik mamandardy irikteýiniń ózi bolashaq basshylardyń qarym-qabiletin erte baıqap, olardyń talpynysyna tamyr tartyp, umtylystaryn shyńdaýǵa baǵyttalǵan eken. Osyndaı jas mamandardyń basyn qosqan kezdesýde Saýat Myńbaev jınalǵandardy Biryńǵaı kadrlyq rezervke alynýlarymen quttyqtady. Ol sondaı-aq, «QazMunaıGaz»-dyń uzaq merzimdi damýyndaǵy basym baǵyttarynyń biri – bolashaǵy zor jas kóshbasshylardy izdep, zamanaýı quzyretti meńgergen, jańa turpattaǵy basshylardy daıyndaý maqsatyndaǵy kadrlyq rezervti daıyndaý ekenin basa aıtty.
Árıne, kompanııa basshylary bıznesti transformasııalaý aıasynda rezervtegi qyzmetkerlerge úlken úmit artady, sebebi, ózderiniń qajyrly eńbekteri men joǵary biliktilikteriniń arqasynda olar «QazMunaıGaz» kompanııasynyń alǵa qoıǵan strategııalyq maqsattary men mindetterin júzege asyrýǵa eleýli úles qosady degen zor senimde.
Búginde «QazMunaıGaz» UK AQ transformasııalaý baǵdarlamasyn oıdaǵydaı júzege asyrýda. Mine, biryńǵaı kadrlyq rezervti qalyptastyrý jobasy da osy baǵdarlamanyń bir bólshegi bolyp tabylady.
Kezdesý barysynda rezervtegi qyzmetkerlerdi tanystyrǵan komıssııa músheleri – basqarýshy dırektorlar da sóz sóıledi. Sondaı-aq, «Samuryq-Qazyna» UÁQ AQ-nyń adam resýrstaryn basqarý boıynsha bas dırektory D.Krıýsberg te qatysty. Al «QazMunaıGaz» UK adamı resýrstardy basqarý jáne eńbekaqy tóleý jónindegi Basqarýshy dırektory S erik Ábdenov óz kezeginde bul kezdesýdiń mańyzdylyǵyn erekshe atady.
«Kadrlyq rezerv qurý – bul transformasııa baǵdarlamasynyń ishindegi shuǵyl joba. Nege deseńiz, qazirgi tańda bizdegi basshylyqta júrgen azamattar – munaı-gaz salasynda jyldar boıy jumys istegen tájirıbeli myqty quram. Biraq búginde olardyń kópshiliginiń jasy elýden asqan, ıaǵnı, basshylyq quramnyń elý paıyzdan astamy elý jastan asqan azamattar. Endi bul másele 5-10 jyldyń ishinde úlken problemalar týdyrýy múmkin. Kóp azamattarymyz tıisti zeınet jasyna jetedi. Sonymen, jańa basshylar kerek bolady. Osy jańa basshylardy aldyn ala daıyndaý máselesin biryńǵaı kadrlyq rezerv sheshedi», dedi ol.
Qazaqstannyń munaı-gaz salasy – únemi ózgeris jaǵdaıynda qarqyndy damyp kele jatqan sala. Soǵan sáıkes tehnıka men tehnologııanyń qazirgi deńgeıin sıpattaıtyn qyzmetkerler biliktilikteri men talaptarynyń oryndalýy qajet. Ásirese, basshylyq quramnyń, zamanaýı tehnologııany meńgergen, «bes qarýy» saı bolǵany abzal. Al bul turǵydan alǵanda, joǵaryda atalǵan joba negizinde bolashaq mamandardy erte bastan barlyq jaǵynan oqytyp-jetildirip, tolyqqandy kóshbasshy retinde qalyptastyrýǵa múmkindik bar.
Biryńǵaı kadrlyq rezerv baǵdarlamasynyń negizgi maqsaty –basqarýshylyq qyzmette bolashaq basshylardyń dástúr sabaqtastyǵyn qamtamasyz etý úshin olardy maqsatty túrde júıeli daıyndaý, sonymen qatar, úzdik jumyskerlerge QMG kompanııalar tobynda laýazymdaryn joǵarylatýǵa, ósýge múmkindik berý. Al kadrlyq rezervtiń qatysýshylary qatań baqylaýda kandıdattardyń kásibı jáne jeke qasıetterin naqty ári aıqyn baǵalaý nátıjesinde baıqaýdan ótken «QazMunaıGaz» kompanııalar tobynyń qyzmetkerleri bolyp tabylady.
Jalpy, rezerv quramyna barlyǵy 99 kandıdat qamtylyp, olardyń ishinen assessment baǵalaý men komıssııa sheshimin eskerý nátıjesinde qazirgi kúni bul quramǵa 30 adam iriktelip alynypty. Rezervtegi 30 adamnyń 18-i – korporatıvtik ortalyqtyń qyzmetkerleri, 12-si – QMG kompanııalar tobynyń qyzmetkerleri. Árbir rezervtegi adamǵa jeke jospar bekitilgen, onda ári qaraıǵy damýǵa arnalǵan quzyret pen salalar kórsetilgen. Sondaı-aq, ár rezervtegi adamǵa ári qaraıǵy qyzmettik ósý joldary kórsetilgen laýazymdyq jospardyń da bekitilgenin aıta ketken jón.
Kompanııa óz kezeginde rezervtegilerdiń bilim alyp, ósýi úshin barlyq qajetti jaǵdaıdy jasaıdy. Iá, «bolar bala besiginde bulqynar» demekshi, kompanııanyń bolashaq basshylary eńbek tájirıbelerindegi alǵashqy qadamdarynan-aq qarym-qabiletterin tanytyp, kókeıge qonymdy bilim-bilik, utymdy ıdeıalarymen kózge túsken eken. Jıynǵa qatysqan saıdyń tasyndaı otyz qyz-jigit kezdesýde birinen soń biri jurt aldyna shyǵyp sóz sóılep, ózderiniń bul irikteýge qatysyp, odan úzdik shyqqandaryna rızashylyqtaryn bildirdi. «Másele, bolashaqta bastyq bolý ǵana emes, biz ózimizdi bar jaǵynan kórsetkimiz keledi, maman retinde óskimiz keledi, bilimimizdi shyńdaǵymyz keledi» degen oılaryn bildirgen jas mamandar, bolashaqta kompanııa úshin, jalpy el ekonomıkasynyń órkendeýi jolynda barynsha aıanbaı qyzmet etetinderin jetkizdi.
Dáýlet QANAShAEV, «QazGerMunaı» BK JShS:
– Kadrlyq rezerv quramyna ótken árbir qyzmetker óziniń jeke kadrlyq josparyn anyq biledi. Bul búgingi kezdesý barysynda da aıqyndaldy. Meniń josparym boıynsha bul tek qana laýazymdyq satydan joǵarylaý emes, maman retinde ósýdiń úlken múmkindigi. О́zimizdi barynsha jetildirýge bar jaǵdaı jasalǵan. Bizge osyndaı múmkindik berip otyrǵan «QazMunaıgaz» kompanııasy basshylyǵyna alǵysymyz zor. О́z tarapymyzdan bizge artylǵan úmitti aqtaýǵa umtylamyz.
Renat SALIKOV, «Pavlodar munaıhımııa zaýyty» JShS:
– Men bul zaýytta jumys istegenimen jeti jyl. Bul aralyqta laýazymdyq qyzmettiń eń kishi satysynan bastap, búginde tehnologııalyq qondyrǵylar bóliminiń bastyǵy qyzmetine deıin kóterildim. Bul baǵdarlamanyń mańyzy aldymen ózimizdiń jeke qarym-qabiletimizdi damytýdyń kózi, maqsattarǵa jetýdiń joly, oıda bar ıdeıalardy júzege asyrýdyń kilti dep bilemin. Bir sózben aıtqanda, bul adamnyń maman retindegi ósý jolyndaǵy – úlken múmkindigi.
Aıjan KIRIBAEVA, «QazMunaıGaz» UK AQ:
– О́zimdi kadrlyq rezerv quramynan kórý men úshin qýanysh. Mundaı múmkindik bergen adamı resýrstar departamenti basshylyǵyna alǵysym sheksiz. Kadrlyq rezerv quramyndaǵylardyń bárine aq jol tileımin. Menińshe, kóp nárse ózimizge baılanysty. «Adamdy adam etetin – eńbek» demekshi, aıanbaı eńbek etken adam áıteýir shyńǵa shyǵary anyq. Al qyzmetkerlerimizdiń eńbegin baǵalap, olarǵa osyndaı múmkindik berip otyrǵan kompanııamyzben maqtanamyz. Tek qana alǵa!
Tólegen ERMUHAMBETOV, «QazMunaıGaz» UK AQ:
– Biz ózimizge artylǵan zor jaýapkershilikti jaqsy sezinemiz. Sebebi, biz bolashaq basshymyz degen oıdyń jeteginde emes, bolashaqta kompanııany órkendete túsý úshin ne isteı alamyz degen máseleniń jeteginde júrýge tıispiz. Bul turǵyda búgin ózderińiz kezdesken otyz qyzmetker de laıyqty oryndaryn biledi dep oılaımyn. Biz ózimizdi jetildire otyryp, kompanııanyń qýatyn arttyrýǵa kúsh salamyz.
Dınara BITIKOVA,
«Egemen Qazaqstan».